Муус устар 12 күнүгэр Ылдьаа Нохуоккун аат. култуура киинигэр биир дойдулаахпыт педагог, үгүс өрүттээх уопсастыбанньык, суруналыыс, айар куттаах Светлана Михайловна Бурцева-Суугунай Чараана үс саҥа кинигэтин сүрэхтиир "Алгыс, айымньы, ахтыы - кутум-сүрүм илдьиттэрэ" тэрээһин буолан ааста.
Тэрээһиҥҥэ Кулантай аат. уран сурук түмэлэ туруорбут Светлана Михайловна айар үлэтин кэпсиир "Айар кутум тиһиликтэрэ" быыстапката үгүс сэҥээриини ылла. Быыстапканы кыраайы үөрэтээччи К.Г. Бурцева Светлана Михайловна айар үлэтин эрэ буолбакка, кини үгүс өрүтүн арыйан кэпсээтэ. Чараҥнааҕы бибилитиэкэ, олохтоох дьаһалта тэрийсиигэ көхтөөх кыттыыны ыллылар.


Тэрээһиҥҥэ С.М. Бурцева бииргэ үлэлиир, алтыһар дьоно-сэргэтэ, нэһилиэкпит ытык кырдьаҕастара, нэһилиэк салалтата, депутаттара, улуустааҕы ИДЬМ уопсастыбаннай сэбиэтин, "Уһуктуу" айар куттаахтар, "Кэскил түһэ" ийэ тыл түмсүүлэрин кыттыылаахтара, "Айгылаана" фольклорнай бөлөх, үөрэппит оҕото А.И. Неустроева, суруйааччы Бээрийэ кыыһа Хотойук Айгыына, норуот эмчитэ Баараҕай Бахсы түмсэн кэлэн эҕэрдэлээтилэр, истиҥ санааларын эттилэр.
Тэрээһин үөрүүлээх түгэнинэн буолла - Мүрү уонна I Хоро нэһилиэктэрин дьаһалталарын баһылыктара В.И. Аммосов, В.В. Бурцев уураахтарынан Светлана Михайловна Бурцеваҕа "Мүрү нэһилиэгин" уонна "I Хоро нэһилиэгин" бочуоттаах олохтооҕун аатын иҥэрбиттэрэ.
Үс кинигэ сүрэхтэниитэ - биир киһи эрэ үөрүүтэ буолбатаҕын, бу ыал, бүтүн аймах, нэһилиэк олохтоохторун, улуус дьонун үөрүүтэ буоларын биллибит, астынныбыт.

Күндү Светлана Михайловна! Эйигин икки нэһилиэк бочуоттаах олохтооҕо буолбуккунан эҕэрдэлиибит, эйиэхэ бары үтүөнү, кэрэни баҕарабыт!